Fadhi-ku-dirir:…

Fadhi-ku-dirir: HEES CUSUB

 Waxaa qortay: Amina Muuse Weheliye

 

 Kooris:

 

Dubad Shaaha soo daji,

Daangadana inoo keen,

Sheekada durdurinee….

 

1:

 

Horta waan ku dawaqee,

Maxaa leeysu dilayaa?

Yaa dulmiga inoo wada?

Yaase diinta baylahay?

Kumaa daqarka jeexay?

Keese wada danteenoo?

Aan ku daba dugaalnaa?

 

 

2:

 

War kuwani dugaagtii

Bahalkii dad qaadka ah

Masaskii wax dili jiray

Waa kuwo ka sii daran

Dadka iyo duunyada

Midna uma duxaane

Maxaad isugu daasheen?

 

3:

 

Warhooy kuwiina daganoow

Dalkiina waad ka timideen

Dibadina ma joogtaan

Fadhi-ku-dirir dan maahane

Ordoo dumarki aadoo

Guryihiina dalabtiyo

Ka ilaalsha deelqaaf.

 

 

 

 

4.

 

War bal eegga dunidaan

Iskudagantay ee hurri

Maxaa siyaasad doodeed

Idingaliyey diifteed

Waaydinka daleeshiyo

Dibadaha wareegee

Maad dantiina garataan?

 

5:

 

Alla doqonsanaayoo

Isla daaman weeynaa

haweenkaan ku daalay

sholongooyin daahsoon

ordoo diirimaadkii

siiya dabacsanaantii

lagu dooray jiray oday

 

 

6:

 

Dar kalena an raacshee

Caruurtiina diintiyo

Dariiqii ilaaheey

Dhaqankii dugsoonaa

Degananaanta soo bara

Daroogada ka celiyoo

Daruustana ka caawiya.

 

3 thoughts on “Fadhi-ku-dirir:…

  1. Masha Allah Abwaan aamina gabayga fadhi ku dirir waa mid aad u qiimo badan murti iyo mug weyn leh mahadsanid

  2. OHhhhhhh………….
    maansha al ish calaa goboy aamino shaqo wanaagsan halkaagaas ka sii wad

Leave a Reply